الناقد الرياضي السيد المصيلحى يكتب: الكابتن طارق العشري “عُد غنمك يا جحا!”

إحنا عايشين كابوس بسبب قرارات عبثية بيتخذها ناس بتتعامل مع النادي الإسماعيلي كأنه “تجربة” مش كيان كبير له تاريخ وجمهور.
إزاي في توقيت هو الأخطر على الإطلاق لا قيد اتفتح، ولا صفقات اتعملت، وعدد اللاعبين قليل سواء ناشئين أو خبرة—نسمع عن إعارات “بنية البيع”؟!
هو إحنا ناقصين؟! ده وقت نلم فيه الفريق ونقفله بالضبة والمفتاح… مش وقت نفرّط في لاعب واحد.
اللي وصل الإسماعيلي للحال ده مش سوء حظ… ده نتيجة مباشرة لقرارات غير مدروسة، وبيع واستغناء وإعارات في توقيتات غلط، وبلا أي حساب.
وأنا بقولها بوضوح:
المدير الفني مسؤول عن الملعب والخطة… لكن الإعارة والاستغناء لازم موافقة مجلس الإدارة ورقابة حقيقية.
مش طبيعي ندي المدرب صلاحيات مطلقة “من غير منظار”، وكأن النادي ملكية خاصة! أي قرار إعارة أو استغناء الآن… جريمة لا تُغتفر. ولو كان الثمن رحيل المدير الفني نفسه—فليكن.
المدير الفني ممكن يمشي بكرة بسبب النتائج… لكن اللاعب عقده رسمي ومدته محددة مع النادي، وده مربط الفرس.
ارحموا عزيز قوم ذل