« عبد الله محمود عمر » أول الجمهورية شعبة علمي علوم : « سر تفوقي حفظ القرآن » وافتخر إني من فاقوس

“سر تفوقي حفظ القرآن”.. دي الجملة اللي قالها الطالب عبد الله محمود عمر الأول على الجمهورية في شعبة علمي علوم بالثانوية العامة بنسبة 100%

من قلب الشرقية، وتحديدًا من مدرسة فاقوس الرسمية لغات، خرجت قصة نجاح ملهمة بطلها الطالب عبد الله محمود عمر صابر

عبد الله حقق إنجاز غير عادي، الأول على الشعبة العلمية بالدرجة النهائية: 320 من 320! رحلة تفوق عبد الله مكنتش وليدة اللحظة، دي ثمرة اجتهاد والتزام لسنوات.

والسر الحقيقي، زي ما قال عبد الله، كان القرب من ربنا وحفظ القرآن الكريم! عبد الله ختم القرآن مرتين، المرة الثانية كانت في سنة تالتة ثانوي نفسها، وكان هو سر السكينة والتركيز وسط كل الضغوط.

النظام كان أساسي في يومه، مذاكرة أول بأول من غير تأجيل، وفي الترم الثاني، زادت ساعات المذاكرة لـ 7 ساعات يوميًا، بس التركيز دايماً كان على الفهم مش مجرد الحفظ.

ووالدته، اللي بتشتغل موظفة، كشفت إن عبد الله كان بيحرص يحل تدريبات من كتب كتير عشان يلم بكل أفكار المنهج، ده غير المتابعة الدقيقة مع مدرسته اللي قدمتله دعم كبير جداً.

والدة عبد الله أكدت إن الفترة اللي فاتت كانت صعبة أوي، بس تكاتف الأسرة كلها ومساندتهم ليه كان هو حجر الزاوية في النجاح المشرف ده.

ومع التعب والإرهاق، كان بر الوالدين ودعواتهم هم الطاقة اللي بتخليه يكمل.

وعن لحظات الامتحانات، عبد الله كان عنده استراتيجية ذكية لترتيب وقته واستغلال جهده بالشكل الأفضل.

أما الحلم؟ عبد الله بيتمنى يدخل كلية طب القصر العيني ويتخصص في جـ.ـراحة العظام، وطموحه يرفع اسم مصر كعالم من علماء الطب، ونفسه كمان يستكمل دراسته في ألمانيا!

والد عبد الله، الحاصل على ليسانس لغات وترجمة والمقيم في ألمانيا، قال إن التفوق ده مش مفاجأة؛ لأن عبد الله متعود على المركز الأول من صغره، ودايمًا كان بيقوله: إن شاء الله يا عبد الله هتكون من أوائل الجمهورية والوزير هيكلمنا بنفسه.

البيت كله نموذج للتفوق والدعم الأسري، مع أخوه عبد الرحمن في طب وأخته رضوى في ثانوي.

رسالة عبد الله لكل طلاب الثانوية: اجتهدوا وما تستسلموش، اعملوا اللي عليكم عشان ما تحسوش بالندم، والنجاح بيجي بالثقة في ربنا ثم في النفس.

ألف مبروك لعبد الله، ومن نجاح لنجاح ألمع إن شاء الله!