تصريحات مثيرة ل محافظ اسماعيلية : مش دوري أروح أجيب « رجال أعمال » وأطلب منهم يحطوا فلوس وليس لي مصلحة شخصية « ده ناديكم وبلدكم »
كشف اللواء نبيل حسب الله محافظ الإسماعيلية عن الكثير من الأسباب التي كانت وراء استمرار مسلسل إنهيار قلعة الدراويش وقال : كان هناك اتفاق استثماري إماراتي لكن بسبب ظروف الي حصلت في المنطقة اختلفت الأمور وبعدها كان فيه مستثمر ليبي وتم الاتفاق على ضخ استثمارات تساعد في سداد ديون النادي وحل أزمة القيد إلى جانب إقامة مشروعات داخل النادي يكون منها عائد يساعد على تطويره مستقبلًا واضاف : بعض أبناء الإسماعيلية تواصلوا مع المستثمرين، لضخ الفلوس ويتم الصرف من خلالهم وبعد هذه الاتصالات تراجع المستثمرون ورفضوا استكمال الاتفاق أو ضخ أي أموال، وانتهى الاتفاق وتابع المحافظ : لو عندكم رجال أعمال في الإسماعيلية وعندهم رغبة حقيقية في دعم النادي أو تقديم مقترح استثماري، أهلًا وسهلًا وأنا مش دوري أروح أجيب رجال أعمال وأطلب منهم يحطوا فلوس في النادي، ولا أنا ليا مصلحة شخصية ولا هحط جنيه في جيبي.. ده ناديكم وبلدكم.
وواصل المحافظ حديثه وقال : أنا حاولت أساعد لأن الإسماعيلي يهمني، لكن للأسف ما لقيتش حد مستعد يساعد بشكل حقيقي، باستثناء نائبتين من السيدات كان عندهم استعداد للمساعدة، غير كده ما شفتش حد قال أنا مستعد أحط جنيه في النادي الإسماعيلي ولو حد عنده حل أو مستثمر أو فكرة حقيقية.. الباب مفتوح لكن خلونا نتكلم عن حلول ونبني، بدل ما نهدم أي فرصة وبعدين نقول النادي بيضيع…. اللي هيجي يقعد معايا بخصوص النادي الاسماعيلي ويجي يقول لي انا هحط مليون جنيه للنادي ما يجيش يفتح كلام لا يفيد يضيع وقت !
