إبراهيم ربيع يكتب: في مفسدة الكورة رجال أعمال بعين ملونة أو جلد متحمص أوسحنة لصوص أفلام الأبيض واسود

أي رجل أعمال بيحصل له حالة تشبع من الرفاهية والفلوس زي ماإنت تاكل لحمة كل يوم وتبقي نفسك تاكل أي حاجة غريبة..فلا تعبر عن دهشتك وأنت تري رجل أعمال من أي نوع ، ”عينه” ملونة وللا جلده متحمص وللا سحنته زي حرامية أفلام الأبيض والأسود، تلاقيه في مناسبة كروية مهمة فيها حساسية وزخم جماهيري خارج لك من شباك إعلامي يقولك حاجة تافهة أو شاذة وكل دقيقة يفتح موبايله يشوف كام واحد رقعه إعجاب أو تعليق ،وياسلام سلم لو فيه برنامج تليفزيوني كل إللي فيه بيتكلموا بأجر جابوه علي الهوا يزرط ويقولك كلام حلو يزوق به المفسدة أللي عايشها،يعني الراجل ربنا خلقه يملك فريقا ويشجع فريقا ثانيا..انفصام غريب.. بس مشكلته إن كتير من حبايبنا المجاذيب بيحبوه موت..وإحنا دلوقتي في موسم كورة إللي عايز يفك زنقته النفسية مع تخمة التشبع المالي والترفيهي يتفضل يهلفط ويعيش أحلي أوقاته..طيب الناس المحترمة زعلانة منهم ليه ..همه اتربوا علي كدة ..انت بس اتعب نفسك وخش علي تاريخهم هتشوف جمعوا ثرواتهم ازاي ومنين وبيضحكوا علينا ازاي..افتكروا البلاوي إللي عملوها وطلعوا منها زي الشعرة من العجينة..سهلة قوي حتي لو واحد فقد حياته..مش مشكلة شوية فكة وشوية أخبار برضو بشوية فكة..والله يرحمه يعني لو عاش كان هيبقي زي الميت..بس أهو اندفن بفلوس ..هو الكسبان..