مجدي الجندي يكتب : السيئون لا يتغيرون من أجلنا.. والطيبة مش ضعف
زمان كان للناس أصول، وللعيش والملح حرمة، وللجيرة حق، وللصداقة مواقف، وللكلمة قيمة. كان الواحد يطمن للي يعرفه، ويأمن للي عاشره، ويعتبر المعروف دينًا في الرقبة، مش فرصة يستغلها وقت المصلحة.
لكن إيه اللي حصل لنا؟ وإزاي وصلنا لزمن بقى فيه بعض الناس بتبيع العِشرة عند أول خلاف، وتنكر المعروف عند أول مصلحة، وتطعن في ضهر اللي وقف جنبها، وكأن الطيبة بقت تهمة، والجدعنة سذاجة، والوفاء عملة قديمة مالهاش مكان بين الناس؟
المشكلة إننا أحيانًا بنفضل نحسن الظن بأشخاص أثبتوا لنا أكتر من مرة إنهم مش أهل للثقة. ندي فرص جديدة، ونبرر الإساءة، ونقول يمكن الظروف غيرتهم، أويمكن المرة دي يفهموا قيمة العِشرة. لكن الحقيقة إن فيه ناس مش بتتغير علشانك، مهما عملت معاها، ومهما قدمت من تضحيات. تلاقي واحد أكرمته وطلعت جدع معاه
، ولما يغيب عنك يتكلم عليك. وواحد فتحت له باب بيتك، فيكون أول من يسيء إليك. وواحد وقفت جنبه وقت الشدة، ولما ربنا يفتحها عليه، يتعامل معاك وكأنه ما يعرفكش. والأصعب من الإساءة نفسها إنك تكتشف إن كل المواقف الحلوة اللي كنت فاكرها متبادلة، كانت من طرف واحد.
والحكاية مش في زمالة الشغل بس، دي بقت موجودة في الجيرة، وبين الأقارب، وفي الصداقات، وحتى في علاقات كان المفروض تكون أقرب وأحن. بقينا نسمع عن خلافات على مصالح، وقطيعة بسبب فلوس، وخصومات بسبب كلمة، ونشوف ناس بتنسى سنين العِشرة علشان مكسب مؤقت. بس برضه مش معنى إن الزمن اتغير إننا نتخلى عن أخلاقنا، ولا إن بعض الناس خذلتنا يبقى نتحول لنسخة منهم. الطيبة مش ضعف، والتسامح مش عجز، لكن الغلطة إننا نفضل فاتحين أبوابنا للي كل مرة يدخل منها علشان يوجعنا.
اتعلم تحط حدود، وتعرف مين يستاهل قربك ومين الأفضل تسيب بينك وبينه مسافة. سامح لو تقدر، لكن مش لازم ترجع كل الناس لمكانتها القديمة، ومش كل اعتذار معناه إن الثقة رجعت زي الأول.
إحنا مش مطالبين نكره حد، ولا نرد الإساءة بإساءة، لكن من حقنا نحافظ على نفسنا وكرامتنا، ونبعد عن كل
علاقة بتستنزف أرواحنا وبتكسر خاطرنا. خليك طيب، بس مش ساذج.. خليك أصيل، بس ما تسمحش لحد يستغل أصلك.. وحافظ على أخلاق زمان، حتى لوناس كتير نسيتها. لأن السيئين مش هيتغيروا علشان خاطرنا، لكن إحنا كمان مش لازم نتغير علشان بقينا عايشين وسطهم.
