مجدي الجندي يكتب : الإسماعيلية بلد المانجو.. شجرة قدام كل بيت

بما إن الإسماعيلية بلد المانجو، واسمها معروف في مصر والعالم بجودة محصولها، يا ريت كل واحد فينا يزرع شجرة مانجو قدام بيته، وتبقى المانجو في كل بيت إسماعيلاوي، والخير للجميع.

نزرع شجرة، ونأكل من خير أرضنا، ونعلّم أولادنا إن الزرع خير، وإن الشجرة مش بس ثمر وظل، لكنها كمان رسالة حب وانتماء لبلدنا.

والأجمل من شجر المانجو إننا نزرع المحبة في قلوب بعض، ونتعلم نحترم بعض، ونحافظ على سمعة الإسماعيلية وأهلها الطيبين. كفاية كلام على بعض، وكفاية فتنة ونميمة ونقل كلام يفرّق بين الناس. إحنا أولى ببعض، وبلدنا تستحق مننا كل خير.

خلّوا الإسماعيلية بلد المانجو والمحبة والأصول.. شجرة قدام كل بيت، وكلمة طيبة بين كل اتنين، وقلب نضيف مفيهوش حقد ولا ضغينة.
الإسماعيلية مشهورة بمانجتها، ونتمنى كمان تكون مشهورة بأخلاق أهلها وجدعنتهم واحترامهم لبعض.

مجدي الجندي

‫